Zvicra e ndihmon decentralizimin në Kosovë me 3 milionë franga

Qeveria zvicerane do të japë 3 milionë franga për procesin e decentralizimit në Kosovë. Një marrëveshje e nënshkruar mes ministrisë së Administrimit të Pushteti Lokal dhe Qeverisë Zvicerane jetëson projektin, e koncentruar kryesisht në komunat e reja: Kllokot, Ranillug, Shtërpcë, Hani i Elezit, Kamenicë, Kaçanik, Viti e Partesh.

Zëvendësministri në largim, Raif Elezi ka thënë se projekti do të zbatohet në një periudhë dy vjeçare dhe do të koncentrohet në forcimin e kapaciteteve në nivel komunal, me qëllim të sigurimit të arritjes së reformimit të pushtetit lokal.

Duke potencuar se qeveria e tij u tregon taksapaguesve të vet për çdo frang të shpenzuar, drejtori i zyrës zvicerane për bashkëpunim, Samuel Waelty ka thënë se beson që projekti do të ndikojë  drejtpërdrejt në përmirësimin e jetëve të qytetarëve.