Zvicra gati të organizojë konferencë për procesin e paqes në Ukrainë

(KEYSTONE/AP Photo/ (AP Photo/Rodrigo Abd)

Zvicra është e gatshme të organizojë një konferencë për procesin e paqes në Ukrainë, deklaroi Presidentja e Konfederatës, Viola Amherd duke iu përgjigjur në këtë kuptim kërkesës së Volodymyr Zelensky.

Ajo ka deklaruar se tani mbetet për të përcaktuar një datë dhe për ta organizuar atë duke shtuar se duhet të zhvillohet brenda vitit 2024, shkruan RTS.

Organizimi i konferencës do të jetë nën përgjegjësinë e Departamentit Federal të Punëve të Jashtme dhe ekipet do të punojnë shumë për të arritur ngritjen e kësaj konference për procesin e paqes të dëshiruar nga Kievi, transmeton albinfo.ch.

Roli i Zvicrës vlerësohet

Presidenti ukrainas Volodymyr Zelensky, ka përshëndetur pozicionin e Zvicrës në konfliktin me Rusinë. “Bota po ju shikon dhe po merr parasysh pozicionin tuaj. Zvicra luan një rol të rëndësishëm në rivendosjen e paqes së drejtë “, ka thënë ai.

Zelensky shprehu mirënjohje për mbështetjen e Bernës për krijimin e një gjykate ndërkombëtare për të gjykuar krimet ruse.

“Ne duhet të sigurojmë që udhëheqësit ushtarakë dhe politikë rusë të përgjigjen për veprimet e tyre para gjykatave”, tha ai.

Ndryshe, Volodymyr Zelensky gjithashtu përshëndeti faktin që Zvicra kishte rifilluar sanksionet e BE-së kundër Rusisë. Për të theksuar rëndësinë e parandalimit të anashkalimit të sanksioneve për të parandaluar Rusinë të zhvillojë armë të reja që do të godasin Ukrainën. Ai insistoi gjithashtu në nevojën e përdorimit të fondeve ruse të ngrira jashtë vendit për rindërtimin e vendit të tij.