Zvicra, klauzolë për kufizimin e numrit të shtetasve të BE-së

Këshilli Federal i Zvicrës i ka propozuar Parlamentit që zbatimin e iniciativës kundër migrimit masiv (të votuar nga populli në vitin 2014) ta lidhë me një klauzolë të veçantë, të njëanshme. Kjo klauzolë nënkupton që Zvicra, pa pajtimin e Bashkimit Evropian, të vendosë për caktimin e kuotave ose kufijve të skajshëm të numrit të të huajve nga BE-ja që u lejohet qëndrimi në Zvicër.

Ky është aktualisht varianti i vetëm, për faktin se jetësimi i iniciativës së përmendur duhet të fillojë së shpejti, ndërkohë që ende nuk është arritur të bihet në pajtim me Brukselin, ka thënë ministrja Simonetta Sommaruga, njofton srf.ch.

Ajo ka shtuar se nuk bëhet fjalë për një zgjidhje të pastër dhe as përmbyllëse. Kjo klauzolë vështirëson qasjen e shtetasve të BE-së në tregun zviceran të punës, transmeton albinfo.ch. Dhe, kjo pastaj e rrezikon marrëveshjen për lëvizje të lirë dhe me këtë gjithë pakon e marrëveshjeve bilaterale.