Zvicra sot pret fitore historike ndaj Polonisë

Nëse do të fitojë sot, Nati do të realizojë një fitore historike. Asnjëherë deri tash kombëtarja zvicerane nuk ka fituar në ndonjë kampionat evropian ose botëror në një fazë të tillë (e teta e finales)

Nuk ka mbetur as një orë e plotë deri në fillimin e ndeshjes në mes të Zvicrës dhe Polonisë që luhet në të tetën e finales në Evropianin 2016. Ndonëse fitoren e fundit kundër Polonisë zviceranët e kanë pasur para 40 vitesh, trajneri Petkoviç ka thënë se do të luajnë pa frikë por me respektin maksimal ndaj polakëve.

Ai ka vlerësuar lart forcën në mbrojtje që e ka Polonia, e cila në këtë kampionat nuk ka marrë asnjë gol deri tash. Por Petkovic nuk e ke ndërmend t`i vërë nën presion të madh sulmuesit e tij.

Kapiteni Lichtsteiner ka tërhequr vërejtjen sidomos ndaj sulmuesit të njohur të Polonisë, Lewandowskit. “Ai bën pjesë ndër sulmuesit më të mirë në botë dhe mund të paraqesë problem për ne”, ka thënë ai. Ndërsa fakti se Lewandowski në këtë kampionat nuk ka shënuar akoma asnjëherë, për kapitenin zviceran është i parëndësishëm.

Nëse do të fitojë sot, Nati do të realizojë një fitore historike. Asnjëherë deri tash kombëtarja zvicerane nuk ka fituar në ndonjë kampionat evropian ose botëror në një fazë të tillë (e teta e finales).