Zvicra u ka ofruar mbrojtje 4000 refugjatëve nga Siria

Sommaruga kishte udhëzuar përfaqësitë zvicerane në Turqi, Liban, në Egjipt dhe në Jordani që të ofronin viza për udhëtim në Zvicër. Nga ky aksion mund të përfitonin bashkëshortë/et, fëmijët dhe familjarët tjerë të afërt të sirianëve që jetojnë në Zvicër

Në vjeshtën e vitit 2013 personat nga Siria me qëndrim në Zvicër të cilët donin të merrnin familjarët e tyre këtu, kishin mundësi ta bënin këtë duke shfrytëzuar vizat speciale që ua kishte mundësuar shteti zviceran. Sipas të dhënave të Këshillit Federal këtë lehtësim e kanë shfrytëzuar afër 4000 sirianë të cilët kanë ardhur në Zvicër gjatë periudhës së përmendur.

Ky vendim që ishte marrë nga ministrja e drejtësisë, Simonetta Sommaruga në shtator të vitit 2013 kishte pasur ndikim të rëndësishëm në jetët këtyre njerëzve. Sommaruga kishte udhëzuar përfaqësitë zvicerane në Turqi, Liban, në Egjipt dhe në Jordani që të ofronin viza për udhëtim në Zvicër. Nga ky aksion mund të përfitonin bashkëshortë/et, fëmijët dhe familjarët tjerë të afërt të sirianëve që jetojnë në Zvicër. Për të shfrytëzuar këtë mundësi mjaftonte që të përmendurit ta bënin të besueshme afërsinë familjare me sirianët që kishin qëndrim në Zvicër. Prej tyre po ashtu nuk kërkohej dëshmia se kanë të holla të mjaftueshme për të paguar qëndrimin e tyre në Zvicër. Atëbotë në Zvicër jetonin gjithsej rreth 1600 sirianë.

Deri në shtator të vitit 2014 ndërkaq, te të afërmit e tyre në Zvicër kanë ardhur gjithsej 3849 shtetas sirianë, ndërkohë që mijëra kërkesa janë refuzuar.