1.2 milionë vende të lira të punës në Gjermani

Numri i vendeve të lira të punës është rritur në Gjermani me 128 mijë më shumë se nga fundi i vitit 2016

Nëse kërkoni punë, atëherë, vendi i preferuar është Gjermania. Më shumë se 1.2 milionë vende pune të lira janë regjistruar në fund të vitit 2017 dhe ky është numri më i lartë i vendeve të kërkuara që nga bashkimi i Gjermanisë në vitin 1990, shkruan albinfo.ch.

Kështu thuhet në raportin e fundit nga Instituti për Hulumtime i Punësimit (IAB) në Nuremburg. Në tremujorin e fundit të 2017, kishte më shumë se 1.2 milionë vende pune të paplotësuara në mbarë vendin, raporton “The Local”.

Numri i vendeve të lira të punës është rritur në Gjermani me 128 mijë më shumë se nga fundi i vitit 2016.

Në pjesën perëndimore të Gjermanisë, numri i vendeve të lira të punës është regjistruar në rreth 918,000 pozicione, ndërsa numri i vendeve të lira në Gjermaninë Lindore është rreth 265,000.

Më së shumti punëtorë kërkohen në sektorin e prodhimit dhe atë të ndërtimit, kurse numri më i madh i vendeve të punës është i lidhur me biznesin siç janë administrimi, marketingu dhe shitjet.

Gjithashtu Gjermania po shënon një rekord pozitiv, pasi papunësia në vend është zvogëluar dukshëm, më e ulëta që nga viti 1990.