11 tetor përfundon afati për votimin me postë për votuesit jashtë Kosovës

Komisioni Qendror i Zgjedhjeve (KQZ) ka njoftuar se më 11 tetor përfundon afati për votimin përmes postës për qytetarët e Kosovës që jetojnë jashtë vendit. Ky proces është pjesë e Zgjedhjeve Lokale për Kryetarë të Komunave dhe për Kuvendet Komunale, përcjell albinfo.ch.

Periudha e votimit përmes postës kishte filluar më 17 shtator dhe vlen ekskluzivisht për 43,933 shtetas të Kosovës që janë regjistruar suksesshëm për të votuar jashtë vendit.

Sipas KQZ-së, të gjithë votuesit e regjistruar duhet të sigurohen që pakot e tyre me fletëvotime të dorëzohen në kutitë postare të KQZ-së deri më 11 tetor 2025. Çdo pako e pranuar pas kësaj date nuk do të merret në konsideratë.

Kutitë postare të KQZ-së janë të vendosura dhe funksionale në 24 shtete, përfshirë: Australi, Austri, Belgjikë, Çeki, Danimarkë, Francë, Gjermani, Holandë, Hungari, Itali, Kanada, Kosovë, Kroaci, Mali i Zi, Maqedoni e Veriut, Mbretëri e Bashkuar, Norvegji, Shtetet e Bashkuara të Amerikës, Shqipëri, Slloveni, Suedi, Turqi dhe Zvicër.

KQZ u bën thirrje të gjithë votuesve jashtë vendit që të përfitojnë nga e drejta e tyre për të votuar dhe të dërgojnë fletëvotimet në kohë, për të siguruar që zëri i tyre të jetë pjesë e procesit zgjedhor.