150 mijë fansa gjermanë pushtojnë Londrën

Dhjetëra mijë veta me triko kuq-bardhë dhe zi-verdhë kanë vërshuar sheshet dhe rrugët e metropolit britanik dhe kanë përhapur një atmosferë festive

Rreth 150 mijë fansa gjermanë të futbollit kanë “pushtuar” Londrën në prag të finales së Ligës së kampionëve që luhet më stadiumin Wembley në mes të dy klubeve rivale gjermane: FC Bayern dhe FC Borussia Dortmund. Një numër kaq i madh i tifozëve “garanton” edhe një potencial të konsiderueshëm rreziku.

Qysh disa orë para ndeshjes, janë shënuar incidentet e para në mes të dy grupeve të tifozëve. Dhjetëra mijë veta me triko kuq-bardhë dhe zi-verdhë kanë vërshuar sheshet dhe rrugët e metropolit britanik dhe kanë përhapur një atmosferë festive. Fansat e Borusias këndojnë në sheshet Piccadilly Circus dhe Tafalgar Square, të vëzhguar nga vendësit dhe gazetarët. Ata kanë ngjallur interes me rekuizitat e tyre sportive dhe me gjallërinë që po tregojnë duke kënduar.

Ndërsa fansat e Bajernit kanë qenë më të pakët në numër. Shumë prej tyre kanë udhëtuar në Londër pa siguruar biletë për të parë ndeshjen. Por ata kanë siguruar tashmë vendet më të mira në pubet e Londrës për të ndjekur derbin e madh nga televizori.