19 infeksione të reja gjatë ditës së fundit në Zvicër

33 raste të reja ishin raportuar  të enjten (dje), ndërsa të mërkurën kishin qenë 23 raste, të martën, 16 dhe të hënën 7

Në Zvicër dhe Lihtenshtajn, brenda 24 orëve të fundit janë raportuar 19 infeksione të reja me virusin korona. Deri më tani ka pasur gjithsej 31.063 raste të konfirmuara nga laboratori Covid-19, ka njoftuar Zyra Federale e Shëndetit Publik (BAG) të premten pasdite, shkruan srf.ch.

Numri i infeksioneve ka zakonisht një luhatje javore, duke shënuar ulje në fundjavë, transmeton albinfo.ch. 33 raste të reja ishin raportuar  të enjten (dje), duke ngjallur njëfarë shqetësimi për rritje eventuale të numrit, pasi që të mërkurën kishin qenë 23 raste, të martën, 16 dhe të hënën 7.

Mesatarja e të prekurve është 362 raste për 100,000 banorë.

Sipas BAG, deri më sot 1.677 njerëz të testuar pozitivisht për Covid-19 kanë vdekur në Zvicër dhe Lihtenshtajn, përcjell albinfo.ch. Ndërsa sipas agjencisë Keystone-sda janë 1937 të vdekur deri më tani.

Zyra Federale i referohet raporteve që laboratorët dhe mjekët kanë dërguar deri në mëngjesin e të premten, si pjesë e detyrimit të raportimit.

 

---