Shqipëri: Rritet për 50% numri i turistëve që qëndrojnë në hotele, prijnë italianët

Ilustrim

Gjatë muajit nëntor të vitit që lamë pas, është shënuar rritje e numrit të vizitorëve gjithsej me 30,8%, krahasuar me nëntorin 2023.

Referuar raportit të publikuar nga INSTAT për strukturat akomoduese, numri i vizitorëve rezident është rritur me 2,8%, ndërsa i vizitorëve jorezidentë është rritur me 52,1%.

Numri i vizitorëve jorezidentë të cilët janë akomoduar në rajonin qendër ka shënuar rritje me 56,7%. Në zonat jobregdetare ky tregues është rritur me 53,4%, krahasuar me të njëjtën periudhë të vitit të mëparshëm. Numri i vizitorëve jo-rezident në “hotele dhe akomodime të ngjashme” ka shënuar rritje me 49,1%.

Të dhënat e INSTAT-it tregojnë se gjatë muajit nëntor 2024, numri i netqëndrimeve gjithsej është rritur me 35,8%, në krahasim me muajin nëntor 2023.

Numri i netqëndrimeve të vizitorëve jorezidentë të cilët janë akomoduar në rajonin qendror ka shënuar rritje me 47,6%. Në zonat jobregdetare ky tregues është rritur me 54,6%, krahasuar me të njëjtën periudhë të vitit të mëparshëm.

Numri i netqëndrimeve të vizitorëve jorezidentë të cilët janë akomoduar në “hotele dhe akomodime të ngjashme” ka shënuar rritje me 50,5%.

Gjatë këtij muaji, norma e shfrytëzimit të dhomave të “hoteleve dhe akomodimeve të ngjashme” është 19,5%, kundrejt 12,7% që ishte në muajin nëntor 2023. Ndërsa norma e shfrytëzimit të shtretërve të “hoteleve dhe akomodimeve të ngjashme” është 19,8%. kundrejt 16,2% që ishte në muajin nëntor 2023.

Referuar raportit, 13,8% e vizitorëve erdhën nga Kosova, ndërsa 10,4% e të huajve që vizituan vendin tonë vinin nga Italia. 5,6% e vizitorëve ishin nga Gjermania, ndërsa Mbretëria e Bashkuar renditej e katërta, me 4% të totalit të vizitorëve.