Votat me postë: VV prin bindshëm

Komisioni Qendror i Zgjedhjeve ka përfunduar numërimin e votave me postë për zgjedhjet e parakohshme për Kuvendin e Republikës së Kosovës, të mbajtura më 28 dhjetor 2025. Nga 92 vendvotime të procesuar (100% e totalit), partitë kanë marrë sa vijon:

Lëvizja VETËVENDOSJE! – 72.20% ose 19,344 vota

Lidhja Demokratike e Kosovës (LDK) – 10.15% ose 2,720 vota

Partia Demokratike e Kosovës (PDK) – 9.56% ose 2,560 vota

AAK – Aleanca për Ardhmërinë e Kosovës – 3.90% ose 1,045 vota

Numërimi i votave me postë përfshiu mbi 27,000 fletëvotime të pranuara para Vitit të Ri nga kutitë postare në Bernë dhe Berlin. Për më tepër, rreth 20,000 pako të tjera me fletëvotime janë tërhequr nga kutitë postare jashtë Kosovës më 2 dhe 5 janar, nga qytete si Pragë, Londër, Paris, Zagreb, Stokholm, Stamboll, New York, Kanbera, Kopenhagë, Tiranë, Vjenë, Bruksel, Hagë, Podgoricë, Oslo, Shkup, Otavë, Ljublanë, Romë dhe Prishtinë. Këto vota pritet të numërohen gjatë ditëve në vijim, transmeton albinfo.ch.

Përveç votave me postë, Komisioni ka filluar edhe numërimin e votave me kusht dhe të personave me nevoja të veçanta. Sipas të dhënave preliminare, nga 57 vendvotime me kusht në 38 komuna, janë evidentuar mbi 9,900 votues me kusht dhe 2,860 votues me nevoja të veçanta.

Komisioni Qendror i Zgjedhjeve ka bërë të ditur se numërimi i të gjitha votave, përfshirë edhe votat që mbeten nga jashtë vendit dhe të personave me nevoja të veçanta, pritet të përfundojë gjatë kësaj jave.