21 persona humbën jetën nga përmbytjet në Bosnjë

Të paktën 21 persona humbën jetën në përmbytjet katastrofike që goditën Bosnjën dhe Hercegovinën.

Vetëm në zonën e Jabllanicës kanë humbur jetën 17 persona nga vërshimet dhe rrëshqitjet e dheut që mbrëmë goditën BeH.

Dyshohet se numri i të vdekurve mund të jetë dukshëm më i lartë, pasi qindra njerëz janë ende të zhdukur.

Një numër i madh shtëpish u shkatërruan, u shkatërruan rrugë, ura, madje edhe një hekurudhë. Kërkohet strehim për një numër të madh personash që kanë mbetur pa shtëpi.

Sipas njoftimeve të mediave, dhjetëra persona janë duke u kërkuar në lagjen Donja Jabllanica, ndaj dyshohet se bilanci i zi nga vërshimet është shumë më i lartë.

U përmbytën edhe zonat e Kiseljakut, Kreshevës, Vareshit, etj.

Profesori dhe dekani i Fakultetit të Shkencave dhe Matematikës në Sarajevë, Nusret Dreshkoviç, ka folur për Klix.ba për shkaqet e përmbytjeve katastrofike në BeH, duke theksuar se pasojat janë një kombinim i faktorëve natyrorë dhe njerëzorë. “Ndryshimet klimatike po prekin drejtpërdrejt Bosnjën dhe Hercegovinën, siç konfirmohet në raportet kombëtare, dhe kushtet e motit po bëhen më ekstreme”, argumentoi ai.

Dreshkoviq paralajmëron rritje të paqëndrueshmërisë në regjimin e reshjeve, duke pritur ndryshime edhe më negative gjatë nëntorit dhe dhjetorit. Ai thekson se rritja e temperaturave të dimrit po shkakton shkrirjen e shpejtë të reshjeve, duke krijuar përmbytje të shpejta për shkak të kombinimit të shkrirjes së borës dhe reshjeve ciklonike.

Ai kritikoi mungesën e planifikimit urban që mund të zbuste pasojat e fatkeqësive natyrore. Ai beson se politikanët injorojnë ndryshimet klimatike dhe nuk konsultohen me shkencëtarët për masat për të zvogëluar rrezikun e fatkeqësive natyrore.

Ai thekson veçanërisht rëndësinë e pyjeve në rregullimin e rrjedhave të përmbytjeve dhe zbutjen e efekteve të thatësirës dhe bën thirrje që pyjet të menaxhohen me fokus në funksionin e tyre ekologjik, jo vetëm në masën drunore.