300 milionë franga kompensim për “Verdingkinder”

«Verdingkinder» është emërtim për fëmijët dhe të rinjtë e trajtuar si robër, një fenomen ky që në Zvicër ka ekzistuar deri në vitet 60 të shekullit të kaluar

Keystone

«Verdingkinder» është emërtim për fëmijët dhe të rinjtë e trajtuar si robër, një fenomen ky që në Zvicër ka ekzistuar deri në vitet 60 të shekullit të kaluar. Vetë këta ish fëmijë ose familjarët e tyre kanë iniciuar një iniciativë për kompensimin e dëmeve dhe vuajtjeve të pësuara me vite të tëra.

Pas një odiseade të gjatë dhe kundërshtimeve nga një pjesë e politikës, sot atyre u është njohur nga Parlamenti një zhdëmtim që paraqet kompromis në mes të kërkesave të tyre dhe objeksioneve të politikës.

Në mbledhjen e sotme, Dhoma Nacionale e Parlamentit të Zvicrës ka votuar me shumicë votash që për viktimat në fjalë të dedikohen 300 milionë franga, bëjnë të ditur mediet zvicerane. Nën supozimin se aktualisht ende jetojnë 12000 deri në 15 mijë veta nga kjo kategori, llogaritet se secili prej tyre do të marrë maksimalisht nga 25 mijë franga.

Bartësit e iniciativës, e cila kërkonte 500 milionë franga, kanë sinjalizuar se do të heqin dorë nga iniciativa.

“Verdingkinder” kanë qenë fëmijë pa prindër ose me prindër që janë gjykuar si të papërgjegjshëm, të cilët shteti ua ka dhënë në dorëzim familjeve kryesisht bujqësore, shkruan albinfo.ch. Keto të fundit në shumë raste kanë shkelur të drejtat e këtyre fëmijëve dhe të rinjve, duke i shfrytëzuar për punë të rënda bujqësie dhe duke i keqtrajtuar.