450 pompa ilegale në Kosovë

Nga 900 pika të shitjes së derivateve në Kosovë, vetëm 454 janë të licencuara nga Ministria e Tregtisë dhe Industrisë (MTI)

Jo zyrtarisht bëhet e ditur se në Kosovë  janë të ndërtuara më shumë se 900 pika të shitjes së derivateve, por vetëm 454 prej tyre janë të licencuara nga Ministria e Tregtisë dhe Industrisë (MTI), ndërkaq pjesa tjetër llogaritet të jenë ilegale.

Visar Bajraktari, udhëheqës i divizionit për rregullimin e tregut të naftës, në MTI, tha për gazetën „Zëri“ se në Kosovë janë të licencuara 454 pika të shitjes së karburanteve të naftës, të cilat aktualisht veprojnë në territorin e Kosovës.

Sipas tij, disa prej tyre janë në procedurë ose të ripërsëritjes së licencës, meqë licenca është valide për periudhë dyvjeçare.

Ai tha se i numri i licencave ka trend stabil, që nënkupton se disa mbyllen e disa hapen.

Zyrtarë nga MTI-ja kanë bërë të ditur se gjatë këtij viti rreth 15 pronarë të pikave të shitjes se derivateve kanë lajmëruar MTI-në se për një kohë e kanë pushuar veprimtarinë e tyre.

Mirëpo, në anën tjetër, sipas  burimeve  të gazetës Zëri bëhet e ditur se numri i pikave ilegale të shitjes se derivateve ilegale është më i madh se i atyre që funksionojnë dhe operojnë legalisht.

Kryetari i Shoqatës së Naftëtarëve të Kosovë, Nazmi Bytyqi, tha se nuk ka të dhëna zyrtare te pikave të shitjes se derivateve në gjithë territorin e vendit. Sipas tij, këto të dhëna i ka vetëm MTI-ja.