5 filma nga Kosova në Festivalin e Winterthur-it

Filmi i Blerta Zeqirit "Kthimi" është shfaqur në konkurrencë zyrtare dhe konkurron për njërin nga çmimet që do të ndahen sonte

Në Winterthur është duke u mbajtur zhvilluar për të 16-ën herë festivali ndërkombëtar i filmit të shkurtër “Winterthurer Kurzfilmtage”, i cili përfundon sot, më 11 nëntor. 

Në mesin e disa programeve të tij, ky festival këtë vit ka pasur në fokus filmin ballkanik, ose “Kino Balkan Aktuell”, ku është bërë një prezantim mjaft i vëllimshëm i filmit, nga vendet që kanë dalë nga ish Jugosllavia.

Në këtë kuadër, me katër filma të shkurtër (jashtë konkurrencës zyrtare) është prezantuar edhe “Dokufesti”, festivali i njohur i filmit të shkurtër që mbahet në Prizren. Ndërsa prezantimi i tyre, i shoqëruar nga një debat është mbajtur të mërkurën që shkoi.

Ndryshe nga filmat e dokufestit, filmi i Blerta Zeqirit “Kthimi” është shfaqur në konkurrencë zyrtare dhe konkurron për njërin nga çmimet që do të ndahen sonte. “Kthimit” i është rezervuar një pritje shumë e ngrohtë, veç tjerash edhe për faktin se kohë më parë ka fituar çmimin e parë në festivalin më prestigjioz në botë të filmit të shkurtër, Sundance festival të SHBA-së.

Pas shfaqjes së filmit, Blerim Gjoci, producent i tij nga “Prishtina Film” ka folur në një debat të organizuar në sallën e filmit.

(Nesër në albinfo.ch mund të lexoni një shkrim përmbledhës rreth festivalit të filmit në Winterthur)