500 deri në 1500 euro gjobë për serbët që nuk konvertojnë patentë shoferin deri në afat

Kosovo Police, FB

Ministria e Punëve të Brendshme e Kosovës ka caktuar afatin 23 gusht për ndërrimin e patentë shoferëve.

Për të gjithë serbët që brenda kësaj periudhe nuk konvertojnë patentë shoferët e tyre, do të pasojnë gjobat.

Sipas zëvendësdrejtorit të Policisë të Rajonit të Veriut, Veton Elshani, gjobat do të nisin nga 500 deri në 1500 euro.

“Nuk po flasim për patentë shoferë të Serbisë, por për ato të lëshuara nga struktura paralele, ilegale, një dokument të tillë e trajtojmë sikur nuk ekziston dhe për ne do të thotë që shoferi nuk ka patentë shofer. Në ato raste, me shumë mundësi do të shkruhet gjobë nga 500 deri në 1500. Më pas, shoferi mund të telefonojë dikë që ka patentë të vlefshme për ta marrë makinën ose për ta hequr atë nga rruga”, thotë Elshani.