53% të të moshuarve në Zvicër janë me mbipeshë

Te personat nga 15 deri 34 vjeçarë këtë tregues e kanë 27% ndërsa te moshat 35-49 vjeçare, 42%. të rasteve

Çdo i dyti banor i Zvicrës që ka kaluar moshën 65 vjeçare, është me mbipeshë. Këtë e tregon një statistikë e publikuar të martën nga Zyra Federale për Shëndetësi (BAG).

Sipas kësaj statistike, njerëzit e moshuar kanë shumë më shpesh kilogramë të tepërt në krahasim me të rinjtë, shkruan srf.ch. Kështu, 53 për qind të personave të kësaj kategorie kanë një BMI (Body-Mass-Index) tepër të lartë. Te të rinjtë, pasqyra e BMI-së ndryshon dukshëm, transmeton albinfo.ch. Për shembull, te personat nga 15 deri 34 vjeçarë këtë tregues e kanë 27% ndërsa te moshat 35-49 vjeçare, 42% të rasteve

Dallime të theksuara ka edhe në mes të gjinive. Te moshat e shtyra, mbi 65 vjeç, burrat, me 62%, janë dukshëm më të prekur nga mbipesha se sa gratë. Ndërsa shkalla e mbipeshës te gratë e moshës mbi 65 vjeçare është, sipas BAG, 46%.

Këto shifra janë për brengosje, shkruan BAG në një komunikatë për shtyp. Kjo për faktin se mbipesha e rrit rrezikun për sëmundjet kardiovaskulare, përcjell albinfo.ch. Personat që kanë peshë të tepruar, veç kësaj, kanë rrezikshmëri të shtuar për tu sëmurë nga disa lloje të kancerit dhe të diabetit të tipit 2.

Ushqimi i balancuar dhe lëvizjet në masë të mjaftueshme janë thelbësore për të mbajtur një peshë të shëndetshme të trupit, shkruan BAG.

---