Lideri i lëvizjes për pavarësinë e Katalonjës, shpërngulet në Zvicër

Vendimi për t'i kthyer shpinën Katalonjës ka arsye private dhe biznesi. Ai është themeluesi dhe presidenti i Aranow Packaging, kompani paketimi

Lideri separatist katalanas, Jordi Cuixart, i njohur në Spanjë, është shpërngulur për të jetuar në Zvicër. Ai e ka konfirmuar këtë për gazetën SonntagsBlick.

“Po, unë jam duke u zhvendosur në Zvicër me familjen time”, është shprehur Cuixart. Ai do të vendoset në afërsi të qytetit Neuchâtel, transmeton albinfo.ch.

Politikani i njohur 47-vjeçar ka kaluar pothuajse katër vjet në burg, si dënim për luftën e tij për pavarësinë e Katalonjës. Ai u fal dhe u lirua verën e kaluar.

Cuixart theksoi se masa që ka marrë për të jetuar në Zvicër nuk është arratisje politike. Vendimi për t’i kthyer shpinën Katalonjës ka arsye private dhe biznesi. Cuixart është themeluesi dhe presidenti i Aranow Packaging, një kompani e specializuar në paketim.

Në pranverë, kompania ka hapur një degë të re në Neuchâtel për të zbatuar projekte kërkimore dhe zhvillimi në bashkëpunim me Institutin Federal Zviceran të Teknologjisë në Lozanë (EPFL).

Cuixart ka siguruar në këtë intervistë se ai do të vazhdojë të mbetet aktivist politik.

---