700 milionë euro pritet të kushtojë hekurudha që lidh Shqipërinë me Kosovën

pixabay

Ndërtimi i linjës së re hekurudhore Shqipëri – Kosovë, ku një pjesë e rëndësishme e saj do të kalojë nga Shkodra, pritet ta rikthejë këtë qytet në një qendër të rëndësishme rajonale, në aspektin ekonomik dhe turistik, përcjell albinfo.ch.

Për të diskutuar nga afër detajet e këtij investimi madhor, në Bashkinë e Shkodrës u zhvillua një takim mes përfaqesuesve të dy shteteve, Benet Beci, kryetar i Bashkisë, Shkodër dhe Liburn Aliu, ministër i Infrastrukturës në Kosovë.

Liburn Aliu thotë se kjo linjë hekurudhore do të prekë drejtpërdrejt ekonominë e dy vendeve, prandaj investimi është prioritet nga dy qeveritë.

Hekurudha Shqipëri – Kosovë përllogaritet të ketë një kosto prej 700 milionë eurosh, ndërkohë që kalimi i kësaj linje nga Shkodra ka qenë një nga temat e dakordësuara nga dy qeveritë e Shqipërisë dhe Kosovës.

Ky aks pritet të kalojë nga lugina e Drinit, duke i shtuar vlerat dhe kapacitetet e turizmit në veri të vendit.