75 franga për kthimin e mbiemrit të vajzërisë

Ndryshimet i ka miratuar parlamenti para rreth një viti, duke pasur për qëllim barazimin e bashkëshortëve para ligjit

Duke filluar nga një janari i vitit 2013 në Zvicër do të hyjë në fuqi një rregullim i ri i të drejtës së emrit. Këshilli Federal ka bërë sot të njohura rregullat e zbatimit ku hyjnë edhe ndryshimet e emrit. Me të renë, kur një grua dëshiron të kthejë mbiemrin e vajzërisë që e ka marrë në bazë të martesës, duhet të paguajë 75 franga. Kjo shumë i korrespondon asaj që paguhet për ndryshimin e mbiemrit me rastin e shkurorëzimit.

Ndryshimet e përmendura i ka miratuar parlamenti para rreth një viti, duke pasur për qëllim barazimin e bashkëshortëve para ligjit. Me të renë, të dy bashkëshortët, në parim mbajnë mbiemrat e tyre. Kështu, në të ardhmen nuk do të ketë mbiemra të dyfishtë të tipit Leutenegger Oberholzer. Megjithatë, të porsamartuarit mund të deklarojnë se do të mbajnë mbiemrin e burrit ose gruas si mbiemër të përbashkët familjar. e njëjta gjë vlen edhe për çiftet homoseksuale.

Fëmijët e prindërve të martuar mund të mbajnë mbiemrin e përbashkët familjar ose, në rast se prindërit kanë mbiemra të ndryshëm, njërin nga mbiemrat e tyre të para martesës. Bashkëshortët mund të vendosin për mbiemrin e fëmijëve të tyre.

Në rast se bashkëshortët në rastin e lidhjes së martesës nuk janë deklaruar se cilin mbiemër do ta bartin fëmijët e tyre në të ardhmen, ata duhet që me lindjen e fëmijës së tyre të parë të deklarohen me shkrim në zyrën civile për këtë gjë.