“Netët e filmit shqiptar” në 80-vjetorin e çlirimit të Shqipërisë, në Cyrih

Ambasada e Republikës së Shqipërisë në Zvicër: "Nëntori Shqiptar" pjesë e festimeve të 80-vjetorit të çlirimit, me "Netët e Filmit Shqiptar" në Cyrih

Në kuadër të programit “Festojmë Nëntorin Shqiptar”, Ambasada e Republikës së Shqipërisë në Zvicër organizoi një eveniment të veçantë në Bibliotekën “Pestalozzi”, në Hardau, Cyrih. Kjo ngjarje u shënua me “Netët e Filmit Shqiptar”, ku u shfaq filmi artistik historik „Nëntori i Dytë“, një ndër krijimet më të shquara të kinematografisë shqiptare.

Ambasada shqiptare në Zvicër u përfaqësua nga Sekretari i Parë, Valon Gashi dhe Monika Zguro.

Znj. Zguro theksoi rëndësinë e këtyre aktiviteteve kulturore për ruajtjen dhe promovimin e trashëgimisë shqiptare jashtë vendit. „Nëntori i Dytë“, një dramë historike e vitit 1982, është një nga filmat më të njohur që portretizon ngjarjet më të rëndësishme të shpalljes së Pavarësisë së Shqipërisë.

Regjia e Viktor Gjikës dhe skenari i Dhimitër Shuteriqit dhe Kiço Blushit sjellin një paraqitje të thellë të periudhës historike të fillimit të shekullit XX, duke përfshirë përpjekjet për liri dhe ruajtjen e identitetit kombëtar.

Filmi tregon momentet jetike të ngritjes së flamurit shqiptar në Vlorë më 28 nëntor 1912, me udhëheqësin e njohur Ismail Qemalin dhe personalitetet më të shquara të asaj kohe.

Filmi „Nëntori i Dytë“ e transportoi audiencën në një periudhë të lavdishme të kombit shqiptar, duke theksuar sakrificat dhe guximin e figurave të shquara që udhëhoqën procesin e shpalljes së Pavarësisë.

Pjesë e programit ishte edhe ekspozita „Në anën e duhur të historisë”, një udhëtim vizual që ilustron kontributin dhe rezistencën shqiptare gjatë Luftës së Dytë Botërore. Kjo ekspozitë ofroi mundësinë për të ndarë emocione dhe kujtime, duke e bërë atë një ngjarje të veçantë për ata që vlerësojnë trashëgiminë kulturore dhe historike të Shqipërisë.

Në mesin e të pranishmëve ishin mësimdhënëse të shkollave të mësimit të gjuhës shqipe në Zvicër, si dhe figura të njohura të komunitetit shqiptar, përfshirë: Vaxhid Sejdiu nga LAPSH Naim Frashëri, Minire Azemi, Albana Bego, Konsulli Vigan Berisha, e të tjerë.

 

 

 

---