Mbërrijnë në Zvicër trembëdhjetë fëmijë të plagosur nga Gaza

Fëmijët janë dërguar në spitale në kantonet Basel-Stadt, Fribourg, Gjenevë, Graubünden, Jura, Ticino, Vaud dhe Valis

Trembëdhjetë fëmijë të tjerë të plagosur nga Rripi i Gazës kanë mbërritur në aeroportin e Gjenevës dhe në atë të Cyrihut. Ata po merren nga kantone të ndryshme dhe po marrin trajtim mjekësor në spitale, sipas Zyrës Federale të Mbrojtjes Civile dhe Ndihmës në Fatkeqësi (FOC), transmeton albinfo.ch.

Fëmijët në fjalë kanë nevojë për trajtim të specializuar mjekësor që nuk mund të ofrohet në Rripin e Gazës, shkruan srf.ch.

Sipas FOC, fëmijët janë dërguar në spitale në kantonet Basel-Stadt, Fribourg, Gjenevë, Graubünden, Jura, Ticino, Vaud dhe Valis.

Siç është bërë e njohur më parë, Kantoni i Cyrihut pati refuzuar të marrë për trajtim fëmijët nga Gaza.

Në fund të tetorit, Zvicra kishte pranuar tashmë shtatë fëmijë.

Sipas FOC, operacioni për evakuimin e fëmijëve të plagosur nga Rripi i Gazës tani ka përfunduar.

---