CVP kundër iniciativës që kufizon mbajtjen e armëve

Me 149 kundër, ndaj 110 votave pro, delegatët e CVP-së kanë mbivotuar gratë nga kjo parti, të cilat, me shumicë kanë votuar në favor të saj

Partia CVP (kristiane popullore), me shumicë votash ka dalë kundër Iniciativës për „Mbrojtje nga dhuna e armëve” që do të hidhet në referendumin nacional më 13 shkurt. Këtë vendim CVP e ka marrë në kuvendin e saj të mbajtur sot në Pratteln (BL).

Duke vendosur kundër iniciativës, me 149 ndaj 110 votave pro, delegatët e CVP-së kanë mbivotuar gratë nga kjo parti, të cilat, me shumicë kanë votuar në favor të saj, shkruan në portalin drs.ch.

Në këtë kuvend delegatët kanë votuar, me një diferencë shumë të ngushtë, po ashtu edhe për zvogëlimin e ushtrisë zvicerane në një trupë prej 80 mijë ushtarësh. CVP është deklaruar edhe për të mbështetur materialisht personat që përkujdesen për familjarët në nevojë. Një person i tillë, sipas kësaj partie do të shpërblehej me 50 franga në ditë.

Partia ka marrë qëndrim po ashtu për caktimin e vlerave më të ulëta të CO2 për automjetet e reja.