Zvicra bllokon një pjesë të pasurisë së ish presidentit tunizian

Ashtu siç kishte paralajmëruar ditë më parë Qeveria Federale, është bllokuar një pjesë e pasurisë së klanit të ish presidentit tunizian Ben Ali që ishte deponuar në bankat zvicerane. Kështu shkruan gazeta „NZZ am Sonntag” duke u mbështetur në konfirmimin që ka marrë nga Departamenti i Jashtëm i Qeverisë së Zvicrës.

Departamenti në fjalë nuk flet për lartësinë e pasurisë së bllokuar dhe as për faktin nëse bëhet fjalë për llogari bankare apo për pasuri fizike. Mediet zvicerane kanë shkruar për një aeroplan të ish diktatorit Ben Ali të parë në Aeroportin e Gjenevës, dhe, nisur nga kjo, spekulohet se mund të jetë bllokuar pikërisht aeroplani në fjalë.