Banorët lokalë kundër centralit atomik “Gösgen 2”

45 për qind e të anketuarve janë kundër ndërtimit të centralit të ri, 38 % pro. Ndërsa 71% janë kundër deponisë për materie radioaktive

Një anketë e bërë me qytetarët e disa komunave të kantonit Soloturn ka ardhur në përfundim se shumica e tyre janë kundër ndërtimit të një centrali të ri bërthamor (Gösgen 2) dhe kundër një deponie të materieve nukleare në regjionin e tyre, shkruan 20minuten.ch.

Të anketuarit janë banorë të rrethinës së centralit ekzistues bërthamor për prodhimin e energjisë elektrike në Gösgen, që është ndërtuar në vitin 1979.

45 për qind e të anketuarve janë shprehur kundër ndërtimit të centralit të ri ndërsa 38 % pro ndërtimit dhe 15% kanë treguar qëndrim neutral.

Ndërkaq, shumë më i madh ka qenë kundërshtimi i popullatës për ndërtimin e deponisë për mbeturina radioaktive. 71 për qind të të anketuarve janë shprehur kundër një deponie të tillë.

Studimi, në kuadrin e të cilit është bërë edhe anketa, është realizuar me porosinë e kryetarëve të 15 komunave në regjionin në mes të Oltenit dhe Araut.