Paris: Një çmim special për librin e Driton Kajtazit

Me rastin e hapjes së edicionit të “Sallonit të librit nga Ballkani”, Driton Kajtazi, drejtor i Institutit ISEAL (Instituti zviceran i studimeve shqiptare), mori çmimin special të publikut për librin e tij «Alba aime les lettres». Po ky libër ka zënë vendin e dytë si libri më i votuar nga personat në internet, edhe pse, siç pohon autori, ai nuk ka Facebook.

Edicioni i vitit 2016 dha mundësinë për herë të parë dhënien e  «çmimit letrar të sallonit të librit nga Ballkani», një çmim i përcaktuar kësaj radhe drejtpërdrejt nga përzgjedhja e lexuesve, të cilët duhet të japin vlerësimin e tyre në mes të pesëmbëdhjetë librave të autorëve me prejardhje nga Ballkani.

Falë iniciativës së shoqatës kulturore “Albania” mbahet çdo vit në Paris nga viti 2010 një ngjarje kulturore dhe letrare e titulluar «Salloni i librit nga Ballkani».

Kjo ngjarje, e vetmja në Francë, e cila i përkushtohet kësaj pjese të Evropës, ka për qëllim të paraqesë shtetet e Ballkanit ndryshe. Ajo ka për qëllim t’i tregojë  publikut francez cilat janë elementet e përbashkëta në kulturën e vendeve të ndryshme të Ballkanit, siç janë historia, politika, gjuhët dhe fetë.

Kjo ngjarje, e mbështetur që nga fillimi nga Qendra Kombëtare e Librit (Centre national du livre), u zhvilluar këtë vit më 27 dhe 28 maj në Paris, me temën «Ballkani ndryshe».