Barka ndalet në “të kuqen”

Një barkë motorike është „ndalur” pikërisht para semaforëve, në momentin kur ai kishte ndezur dritën e kuqe. Kjo ka ndodhur sot rreth orës 14 në Bülach të Cyrihut. Barka i kishte rrëshqitur një qytetari nga rimorkioja e automobilit, dhe ai, pa e vënë re, kishte vazhduar rrugën.

Por, një ngjarje e tillë nuk kishte si të kalonte pa u vënë re nga pjesëmarrësit tjerë në komunikacion, kështu që i zoti i barkës u njoftua dhe as policia e rrugëve nuk vonoi. Këtë ngjarje të pazakonshme e shënuan edhe shumë lexues reporterë të portaleve 20minuten.ch dhe blick.ch. Barka u montua sërish në rimorkio dhe vazhdoi rrugën.

Mbrapa ajo la dëme të vogla materiale dhe, sigurisht, një gjobë të majme për të zotin e saj, për pengim të komunikacionit.