Këto janë ndryshimet që i presin pensionistët e Zvicrës me reformën e pensioneve

Reforma, në radhë të parë nënkupton ngritjen e moshës së pensionimit për gratë, kursimet në pensionet e të vejave dhe ngritjen e kontributeve për arkat e pensionimit

Dhoma Nacionale e Parlamentit të Zvicrës e ka përmbyllur sot debatin e gjerë mbi pensionet  gjegjësisht mbi reformën në këtë fushë. Me votat 106 pro dhe 55 kundër, është miratuar me shumicë drafti i prezantuar, bën të ditur srf.ch.

Në favor të draftit kanë votuar SVP, FDP dhe Liberalët e Gjelbër. Ndërsa kundër ishin SP, Të Gjelbrit, ndërkohë së CVP ishte e përmbajtur.

Reforma, në radhë të parë nënkupton ngritjen e moshës së pensionimit për gratë, kursimet në pensionet e të vejave dhe ngritjen e kontributeve për arkat e pensionimit, transmeton albinfo.ch.

Drafti tash i kalon për votim Dhomës së Kantoneve.

Këto janë ndryshimet më të rëndësishme që ka bërë parlamenti në fushë të pensioneve:

• Dhoma Nacionale ka ngritur moshën për pensionim të grave në 65 vjet. Me këtë vendim, ajo ka ndjekur veprimin e Dhomës së Kantoneve dhe kështu, kjo pikë bëhet automatikisht pjesë e pakos së reformimit të Ligjit mbi Pensionet.
• Një mekanizëm stabilizues për AHV (pensionet e moshës dhe trashëgimisë) do të vendoset në kushtetutë. Mekanizmi që do ta mundësojë këtë shtyrje “me kusht” të moshës për pensionim ka dy shkallë. Sapo fondi për kompensim kërcënohet të bjerë nën masën 100 për qind sa u përket shpenzimeve vjetore, Këshilli Federal detyrohet t`i propozojë parlamentit marrjen e masave për korrektim, transmeton albinfo.ch. Dhe kur fondi në fjalë bie në 80 për qind, mosha e pensionimit do të rritet në 67 vjet.
• Gratë mbi moshën 45 vjeçare nuk do të kenë të drejtë automatike për të marrë pensionin e vejushës.
• Dhoma Nacionale ka hedhur poshtë shtesën prej 70 frangash në muaj në pensionet e reja AHV, shtesë të miratuar më parë nga Dhoma e Kantoneve.