Hapet qendra e përkohshme e azilit në Boltigen, Bern

Kampi i ushtrisë në Boltigen do të shërbejë si qendër federale për azilkërkues gjatë tri viteve në vijim dhe ai duhet të ofrojë strehim për 120 persona

Sekretariati Shtetëror për Migracion (SEM) është duke i bërë përgatitjet për rastin kur numri i azilkërkuesve mund të rritet brenda një kohe të shkurtë. Në një situatë të tillë në kazermën në Thun të Kantonit të Bernës duhet të strehohen deri në 1200 azilkërkues, thuhet në një komunikatë për media, të lëshuar sot nga SEM.

Por për t`u zbatuar kjo në praktikë, duhet të iniciohet një procedurë konsultimesh, shkruan albinfo.ch. Kantoni i Bernës dhe qyteti Thun duhet të deklarohen në kuadër të kësaj procedure  në lidhje me planet.

Ndërkaq, SEM tashmë ka arritur pajtimin me komunën Boltigen të Kantonit të Bernës dhe me Ministrinë e Mbrojtjes. Kampi i ushtrisë në Boltigen do të shërbejë si qendër federale për azilkërkues gjatë tri viteve në vijim dhe ai duhet të ofrojë strehim për 120 persona.