Berlini kërkon sqarime nga Berna për ristartimin e centralit nuklear

Ministria gjermane për Mjedisin dhe Sigurinë Nukleare ka kërkuar edhe zyrtarisht sqarime nga autoritetet zvicerane për zhvillimet rreth centralit bërthamor në Lajbshtad, në kufi me Gjermaninë. Pas një ndërprerjeje prej gjashtë muajsh, të premten ishte aktivizuar dhe ishte shuar menjëherë sërish.
Gjermania nga Zvicra kërkon informacione pse shtatë orë pas ristartimit, centrali i indërtuar në vitin 1984 u mbyll përsëri, transmeton albinfo.ch.

Siç njoftojnë mediat nga Berlini, reaktori bërthamor ishte ndezur në 17.30 të premten, por pasi operatori ka vënë re probleme në sistemin për filtrimin e gazrave nga kondensatori, është vendosur që centrali të mbyllet.

Sipas autoriteteve zvicerane dhe operatorit të centralit, ky incident nuk ka të bëjë me arsyet për përjashtimin e energjisë bërthamore në gusht të vitit të kaluar, kur testet kanë treguar gjurmë të oksidimit të reaktorit.

“Do të donim t’i dinim të gjitha arsyet teknike që çuan në vendimin për të rifilluar punën centrali nuklear”, tha sekretarja shtetërore në Ministrisë gjermane të Mjedisit dhe Sigurisë Nukleare, Rita Schwarzelühr-Shutter.

Më parë, rifillimi i centralit nuklear është kritikuar nga organizata “Greenpeace” dhe ishte iniciuar një peticion kundër hapjes, nënshkruar nga mbi 16 mijë njerëz dhe 12 organizata joqeveritare zvicerane dhe gjermane.

Lajbshtad është një nga pesë impiantet nukleare zvicerane.