Gjithnjë e më shumë të moshuar mbesin pa punë në Zvicër

Siç shkruan “NZZ Sonntag”, është rritur numri i njerëzve mbi 50 vjeç që janë në kërkim të një vendi pune në Zvicër. Numri i tyre është rritur me 32 për qind, në 59 mijë, në pesë vjet, ndërsa rritja e nën 50-vjeçarëve është vetëm 16 për qind, përcjell albinfo.ch.

Një shumicë e këtyre punëkërkuesve nuk përfshihen në statistikat e papunësisë. Nga 59,000 persona, vetëm 39.000 prej tyre ishin zyrtarisht të papunë në fund të marsit. Pjesa e mbetur prej 20 mijësh kanë statusin e “njerëzve jo të papunë që kërkojnë punë”. Këto përfshijnë njerëz, të cilët janë duke ndjekur një shërbim të ndërmjetëm ose janë duke kaluar nëpër ritrajnime.

Dallimi në mes të kohëzgjatjes së papunësisë është si në vijim: të rinjtë gjejnë një punë pas 166 ditësh, ndërsa mbi 50- vjeçarët kanë nevojë për një mesatare prej 273 ditëve. Më 25 prill Sekretariati i Shtetit për Çështje Ekonomike (SECO) do të organizojë një konferencë nacionale mbi punëtorët e moshuar, për të diskutuar për të metat në tregun e punës.