Padia e dy kosovarëve mund t`i kushtojë dikujt në SVP-UDC me 3 vjet burg!

Padia që ka arritur në prokurorinë e Cyrihut do ta përballë SVP-në me një situatë të pakëndshme pikërisht në prag të zgjedhjeve nacionale

Teksti me përmbajtje diskriminuese dhe urrejtëse ndaj kosovarëve i afisheve të SVP-UDC-së në kuadrin e fushatës për kufizimin e imigrimit, sipas të gjitha gjasave përbën shkelje të ligjit mbi diskriminimin racor. Përgjegjësi epër publikimin e këtij teksti mund të dënohen me deri në tri vjet heqje lirie.

Dy kosovarë, persona privatë kishin ushtruar padi penale kundër SVP-UDC-së në lidhje me afishen e publikuar në mediet zvicerane “Kosovarët therin zviceranin”, përmes të cilës kjo parti propagandonte iniciativën e vet për kufizimin e numrit të të huajve në Zvicër.

Padia që ka arritur në prokurorinë e përgjithshme të Cyrihut do ta përballë SVP-në me një situatë të pakëndshme pikërisht në prag të zgjedhjeve nacionale që mbahen këtë të diele. Autorët e padisë kanë vënë “në bankë të zezë” gjithë komitetin iniciues për iniciativën “Kundër imigrimit masiv” dhe vetë SVP-UDC-në, shkruan 20minutenonline.

Siç ka konfirmuar kryeprokurori Hans Maurer, kjo padi ka arritur të premten e kaluar. “Ne, si kosovarë ndjehemi të lënduar rëndë nga kjo fushatë. Në të sugjerohet se të gjithë kosovarët janë kriminelë dhe vrasës, ushqehet urrejtja kundër etnisë sonë”, thuhet në njërën nga paditë. Të dy kosovarët është duke i përfaqësuar juridikisht avokati David Gabor.

Sipas tij, gjendja është e qartë: “iniciuesit e fushatës kanë shkelur normën penale kundër racizmit. Aty bëhet thirrje publike për diferencimin kolektiv të një etnie. Bëhet shpifje kundër një grupi të tërë etnik dhe pjesëtarët e tij janë prekur në dinjitetin e tyre njerëzor”, thotë Gibor. Shkelja e ligjit kundër racizmit tërheq me vete një dënim deri në tre vjet burg ose me të holla.

Ndërkohë, në SVP-UDC nuk merakosen shumë rreth gjithë kësaj. Sipas deputetit nacional Caspar Baader, njëherësh bashkëkryetar i këshillit iniciativ, “afishja nuk drejtohet kundër një grupi etnik porse lidhet me incidentin konkret që ka ndodhur në Interlaken. Është me rëndësi që ne në politikë, edhe përmes incidenteve të këtilla të sensibilizojmë opinionin lidhur me kriminalitetin e të huajveqë është mbiproporcionalisht i lartë”, ka thënë Baader.