Zvicra nuk e di përse nuk kthehen azilkërkuesit në “vendet e sigurta” të Ballkanit

Serbia, me 428 raste të pakthyerish është në vendin e katërt, Bosnja, me 240, në vendin e shtatë ndërsa Kosova, e teta, me 236

Numri i azilkërkuesve me status të refuzuar, por që vazhdojnë të marrin ndihmat materiale, respektivisht nuk kthehen në vendet prej nga kanë ardhur, ka filluar të shqetësojë me të madhe autoritetet e Zvicrës. Janë me mijëra të tillë, mbi tetë mijë, më të shumtët janë nga Nigeria, 1212 sish.

Por, nuk janë azilkërkuesit nigerianë ose të vendeve tjera afrikane ata që shkaktojnë shqetësim, sa “kolegët” e tyre nga vendet e Ballkanit. Këto vende, prej disa vitesh konsiderohen, pa asnjë përjashtim, si “vende të sigurta”, dhe me to Zvicra ka nënshkruar marrëveshjet përkatëse, kështu që riatdhesimi nuk do të duhej të përbënte ndonjë problem.

Mirëpo, siç shkruan tagesanzeiger.online, Serbia, me 428 raste të pakthyerish është në vendin e katërt në listën e palavdishme të shteteve ku shtetasit nuk duan të kthehen. Në vendin e shtatë, me 240 është Bosnja ndërsa Kosova me 236 azilkërkues të pakthyer është në vendin e tetë.

Gazeta i ka hyrë hulumtimit për të gjetur arsyen e një bllokade të tillë. Por, si në nivelin federal, ashtu dhe në nivelet kantonale, ajo ka hasur në rrudhje krahësh: askush nuk e di arsyen!

Në Entin Federal për Migracion, të pyetur rreth kësaj dukurie, përmes zëdhënësit Joachim Gross, thonë: “Thjeshtë, nuk e dimë”. Por, para dy ose tri javësh është vendosur që të bëhet një analizë rreth kësaj. rezultatet nuk mund të priten para fundit të vitit.

David Keller, kryetar i bashkësisë së autoriteteve kantonale për migracion po kështu thotë se nuk ka njohur përse bllokohet riatdhesimi i azilkërkuesve nga Ballkani. Njësoj përgjigjen edhe përgjegjësit e disa kantoneve, të cilët janë pyetur nga gazeta në fjalë.

Vetëm shefi i Entit për Migracion në kantonin Baselstadt ofron një këshillë, në vend të përgjigjes: “Shpejtimi i procedurës së azilit mund të jetë efektiv vetëm në rastet kur vendimet negative mund të jetësohen edhe me zbatimin fizik të tyre”.