Debat për lokacionet e azilit në regjionin e Zvicrës Qendrore dhe Jugore

Nga viti 2019, federata do të udhëheqë qendra për procedurë të përshpejtuar të azilit me 5000 vende, 690 prej të cilave në regjionin e Zvicrës Qendrore dhe Jugore

Pas vlerësimeve të bëra nga Zyra Federale për Ndërtime dhe Logjistikë (BBL) dhe Zyra Federale për Ambient (BAFU), hapja e një qendre të përhershme federale të azilit në Glaubenberg nuk është një zgjidhje e pranueshme, njofton Departamenti Federal për Drejtësi dhe Polici (EJPD) në një komunikatë. Trualli ku duhej të ngrihej kjo qendër gjendet në një zonë të mbrojtur natyrore prandaj kishte rrezik që ngritja e saj do të hidhej poshtë nga gjykata.

Nga viti 2019, federata do të udhëheqë qendra për procedurë të përshpejtuar të azilit me 5000 vende, 690 prej të cilave në regjionin e Zvicrës Qendrore dhe Jugore. Në komunikatën përkatëse të EJPD thuhet më tutje se qeveria ka hequr dorë nga lokaliteti Glaubenberg si zgjidhje në këtë drejtim. Në vend të kësaj, federata angazhohet edhe më tutje që kjo qendër të adaptohet në  zonën ushtarake Wintersried në lokalitetin Talkessel të Sxchwyz-it, afër Seewen-it.

Si zgjidhje e përkohshme deri në ngritjen e BAZ Wintersried, që parashihet të bëhet në vitin 2022, duhet të shërbejë lokacioni Glaubenberg nëse kantoni Obwalden dhe komuna Sarnen e miratojnë një vazhdim me afat të caktuar.

Kantonet e Zvicrës Qendrore do të kenë mundësinë që deri në fund të vitit të ofrojnë një lokacion tjetër si alternativë. Por ky duhet të jetë në përputhje me kriteret e Konferencës Nacionale të Azilit dhe të ketë kosto të krahasueshme me opsionin e Kantonit Schwyz, thuhet në komunikatë. Federata ka shqyrtuar deri më tash 11 lokacione në regjionin e Zvicrës Qendrore. Ndërsa ajo ka arritur ujdi me kantonet dhe komunat për 14 lokacione në gjithë Zvicrën, të ndarë në 6 regjione.