Libër mbi vrasjen e mësuesit nga St. Galleni

Janine Spirig thotë se libri do të ketë përmbajtje biografike dhe ai do t`ia kushtohet fëmijëve të përbashkët me Paul Spirig-un

E veja e mësuesit Paul Spirig, të vrarë në janar të vitit 1999 nga Dedë Gecaj, do të botojë një libër ku do të përpunojë vrasjen e të shoqit. Libri do të dalë nga shtypi më 23 mars të këtij viti.

Janine Spirig, 47 vjeçe, thotë për mediet zvicerane se libri do të ketë përmbajtje biografike dhe ai do t`ia kushtohet fëmijëve të përbashkët me Paul Spirig-un.

Lajmit për këtë libër i është bërë jehonë edhe për faktin se, kur, rreth dy vite më parë, tetari i St. Gallenit kishte planifikuar të përgatiste një shfaqje me titull pune “Vrasja e mësuesit në St.Gallen”, familjarët kishin kundërshtuar projektin. Kjo bashkë me reagimet e opinionit,l kishin detyruar teatrin të hiqte shfaqjen nga programi, shkruan “St.gallet Tagblatt”.

Shqiptari Dedë Gecaj, pasi kishte vrarë mësuesin e të bijës, ishte arratisur në Kosovë, ku ishte dënuar nga një gjykatë serbe. Pas përfundimit të luftës ai ishte liruar nga burgu dhe një kohë të gjatë kishte qëndruar i lirë në Kosovë, ndërkohë që autoritetet zvicerane e kërkonin ekstradimin e tij. Ai pastaj qe ekstraduar, por në fund të vitit 2010 qe gjetur i vetëvrarë në qelinë e tij të burgut në St. Gallen. Për pasojë, nuk qe bërë e mundur t`i bëhej një gjykim i pavarur, në vendin e krimit, në Zvicër.

Familja dhe avokati i tij vazhdojnë të hedhin dyshime mbi vetëvrasjen e tij.