Edhe Sali Berisha reagon për azilkërkuesin e ‘masakruar’ shqiptar në Francë

Ish-kryeministri i Shqipërisë, Sali Berisha, përmes llogarisë së tij në “Facebook” ka reaguar ashpër për ngjarjen e masakrimit të të riut shqiptar, Florenc Beqiri, në Burgun e Marsejës në Francë.

Berisha përmes këtij postimi u bëri thirrje autoriteteve franceze të ndëshkojnë krimin makabër të kryer në këtë burg, përcjell albinfo.ch.

Ai uroi shërim të shpejtë të riut shqiptar, i cili gjendet në gjendje të rëndë shëndetësore dhe në trajtim intensiv mjekësor.

Kjo ngjarje ka bërë bujë në mediat shqiptare, pasi familjarët kanë reaguar se shqiptari është dhunuar në burg.

Ai kishte shkuar si azilkërkues dhe ishte arrestuar pasi nuk kishte dokumente. Megjithatë, në burg ka përjetuar tmerrin sipas familjarëve, dhe tani është në gjendje të rëndë.

Ky është postimi i plotë i Sali Berishës:

“Një i ri i masakruar në burgun e Marsejës! Duke dënuar ashpërsisht këtë akt të rëndë kriminal, u bëj thirrje autoriteteve franceze të ndëshkojnë me të gjithë forcën e ligjit autorin apo autorët e këtij krimi të shëmtuar! Urojmë shërim të plotë të riut shqiptar të masakruar”.