Sadiku i lumtur për bashkimin me Bardhin, pret sukses me Levanten

Ylli i ri shqiptar i Levantes në La Ligë, Armando Sadiku, ka folur për herë të parë si lojtar i klubit spanjoll.

26-vjeëari është shprehur tejet i lumtur në një intervistë për faqen zyrtare të klubit.

“Jam shumë i lumtur që jam këtu. Shokët e mi të skuadrës janë djem vërtet të mirë dhe më ndihmuan shumë në stërvitjen time të parë me skuadrën. Për mua është një hap shumë i rëndësishëm për karrierën time. Jam shumë i lumtur për mundësinë që Levante më dha për të luajtur në La Liga. I kam ndjekur disa ndeshje të Levantes dhe besoj se mund të bëjmë shumë gjëra të mira së bashku”, tha Sadiku, transmeton “Top-Channel”

Te Levante, Sadiku do të luajë së bashku me Enis Bardhin, futbollist shqiptar nga Maqedonia.

“Është një djalë shumë i mirë, me të cilin flas shqip dhe mund të më ndihmojë shumë këto ditë të para këtu. Një përshëndetje edhe për të gjithë tifozët tanë dhe Forca Levante”, deklaroi më tej ai.

Këtë fundjavë, Levante do të presë Realin e Madridit dhe për Sadikun duket se është rezervuar menjëherë përballja me Cristiano Ronaldon, ndërsa pritet vetëm konfirmimi i debutimit të tij.