Banorët e Gjenevës do të votojnë për kufizimet e shpejtësisë në rrugët e kantonit

Ligji që kërkon shpejtësi minimale 50 km/h në rrugët kryesore kundërshtohet nga organizata të mobilitetit, ambientalistë dhe parti të majta, të cilat kërkojnë referendum.

Banorët e Geneva pritet të vendosin përmes një referendumi nëse do të hyjë në fuqi një ligj i ri që përcakton kufizime të reja të shpejtësisë në rrugët e kantonit, përcjell albinfo.ch.

Ligji, i miratuar nga parlamenti kantonal në muajin shkurt, parashikon vendosjen e një shpejtësie minimale prej 50 kilometrash në orë në rrugët kryesore. Qëllimi i kësaj mase është të shmangë përhapjen e gjerë të zonave me kufizim 30 km/h, të cilat janë bërë të zakonshme në disa qytete të tjera të Zvicrës, dhe të përmirësojë rrjedhën e trafikut në Gjenevë.

Megjithatë, iniciativa ka hasur në kundërshtime të forta. Një koalicion organizatash për mobilitetin dhe mbrojtjen e mjedisit, së bashku me parti të majta, ka dorëzuar këtë javë një peticion me 5,456 nënshkrime – 1,184 më shumë se minimumi i kërkuar – për të bllokuar zbatimin e ligjit dhe për ta çuar çështjen në referendum.

Sipas kundërshtarëve, ndalimi i uljes së shpejtësisë në 30 km/h në zonat e banuara, siç kanë bërë shumë qytete të tjera, injoron shqetësimet për sigurinë dhe shëndetin e banorëve lokalë, si dhe ndikon negativisht në cilësinë e jetës së tyre.

Data e mbajtjes së referendumit ende nuk është caktuar. /Albinfo.ch

---