Astrit Leka nderohet me mirënjohje nga Ambasada Shqiptare në Bernë

Ambasada e Shqipërisë në Bernë, në një organizim të veçantë i ka ndarë Certifikatën e Mirënjohjes, patriotit, aktivistit dhe intelektualit të shquar Astrit Leka, nismëtarit dhe realizuesit të vendosjes së bustit të heroit tonë kombëtar Gjergj Katsriot Skënderbeu në Gjenevë, shkruan albinfo.ch.

Në këtë ceremoni kanë marrë pjesë edhe ambasadorja e Kosovës në Zvicër, Nazane Breca dhe shumë personalitete tjera.

Ditë më parë për nder të 550 vjetorit të vdekjes së heroit tonë kombëtar, Gjergj Kastrioti Skënderbeut, Ambasada Shqiptare në Bernë hapi siparin e aktiviteteve në kuadër të “Vitit mbarëkombëtar të Gjergj Kastriot Skënderbeut”, në qytetin e Gjenevës.

Ceremonia u zhvillua përpara bustit të Skënderbeut. Në këtë ceremoni merrnin pjesë, ambasadori i Shqipërisë në Bernë, Ilir Gjoni, ambasadorja e Misionit të Përhershëm në Gjenevë, Filloreta Kodra, ambasadorja e Kosovës, Konsulli i Përgjithshëm i Kosovës në Gjenevë, Ramadan Avdiu, personalitete të kantonit të Gjenevës, historianë, shoqata kulturore të komunitetit shqiptar, etj.