Çmimet e filmave shqiptarë në Berlinale

“Kiem Holijanda”, i xhiruar në Kosovë me aktorë shqiptarë, ishte i dyti film i regjisores së re, Sarah Veltmeyer

Filmat shqiptarë e kosovarë nuk arritën të kapërcejnë garat e Berlinales, por në shfaqjen e madhe gjermane të kinematografisë nuk munguan emrat shqiptarë, e madje as çmimet.

Regjisorja holandeze, Sarah Veltmeyer u nderua me “Ariun e kristaltë” në kategorinë e filmit me metrazh të shkurtër në konkurrimin për të rinj “Generation14plus”.

“Jam e lumtur, por ende nuk po më besohet”, është shprehur ajo për “Deutsche Welle”-n.

“Kiem Holijanda”, i xhiruar në Kosovë me aktorë shqiptarë, ishte i dyti film i regjisores së re dhe i pari me buxhet, përcjell albinfo.ch.

Juria duket se mbeti me mjaft mbresa nga ngjarja e së përditshmes kosovare që ai pasqyronte. Të vlerësuar u ndien edhe katër aktorë të këtij filmi: dy vëllezërit Andi dhe Florist Bajgora, Arbnesha Grabovci-Nixha dhe Shpëtim Kastrati.

Kosovës i shkoi dhe çmimi “Lola e artë”, apo çmimi gjerman për skenarët e paxhiruar ende, i dhënë në fillim të festivalit, të cilin e fitoi Visar Morina. Filmi i tij “Exil” flet për një emigrant që punon në një firmë farmaceutike dhe vë në fokus përplasjet kulturore në të përditshmen e punës.