Mishi nga Belgjika në Kosovë ishte i vjetër 12 vjet

Mishi i prishur nga Belgjika në vendet tjera evropiane, vazhdon të bëjë bujë në mediat belge.

“Het Laatste Niuews” ka raportuar se mishi i transportuar në Kosovë nga thertorja belge, Veviba, ka qenë i vjetër deri në 12 vjet.

Gjithnjë sipas gazetës belge, në një dokument gjykate thuhet se një kamion me mish të Vevibas nga Bastogne ka mbërritur në Kosovë më 19 shtator 2016.

“The Brussels Times” shkruan se mishi ishte i transportuar në Kosovë ishte i vitit 2004.

Gjithashtu është bërë e ditur se një pjesë e mishit ka ardhur nga thertoret në Izegem dhe Harelbeke, dhe se është ripaketuar në kuti që bartnin logon e Vevibas.

Në të njëjtin muaj, Agjencia Federale për Siguri të Ushqimit është kontaktuar dhe është njoftuar për zbulimin e bërë nga autoritetet kosovare gjatë një inspektimi të mishit.

Gazeta ka kontaktuar një profesor në Universitetin e Gentit, Bruno De Meulenaer, i cili ka thënë se mishi i ngrirë për 12 vjet nuk përbën doemos rrezik për shëndetin, të paktën “nëse ngrirja nuk ka pësuar ndryshime dhe nëse mishi është ruajtur vazhdimisht në temperatura minus 18 gradë Celcius”.