Gjermania ka nevojë për punëtorë si kosovarët

Në takim u diskutua edhe për procesin e stërzgjatur të marrjes së vizave të punës, në Ambasadën gjermane në Kosovë

Ministri i Infrastrukturës së Kosovës, Pal Lekaj është takuar me udhëheqësit të kompanisë gjermane “Lammers”, Andreas Lammers.

Gjatë takimit, është diskutuar për gjetjen e mundësive të depërtimit të fuqisë punëtore të Kosovës në shtetin gjerman, përcjell albinfo.ch.

Duke u munduar të shërbejë si urë lidhëse në mes të Kosovës dhe Gjermanisë, ministri Lekaj përmendi anët pozitive të fuqisë punëtore të Kosovës, në njërën anë, kryerja e shërbimeve me çmim shumë të lirë dhe në anën tjetër, aktivizimi i punëtorëve të rinj të Kosovës në vendet perëndimore, në këtë rast në Gjermani.

Në takim u diskutua edhe për procesin e stërzgjatur të marrjes së vizave të punës, në Ambasadën gjermane në Kosovë.

Duke u munduar të ndërmjetësojë, në mënyrë që kjo procedurë të kryhet brenda një afati të arsyeshëm kohor, ministri Lekaj njoftoi Lammers, se edhe kompania e tyre mund të luajë një rol të rëndësishëm sa i përket kësaj çështjeje, pasi çdo gjë që lidhet me fuqinë punëtore të Kosovës dhe me investimet në Kosovë, është edhe në interes të shtetit gjerman dhe jo vetëm kosovar.

Duke e parë Kosovën si një alternativë të mirë për investime në infrastrukturë, si dhe duke treguar interesim për marrëveshje për punësim të kosovarëve në Gjermani, Lammers shprehu respekt për punën e deri tanishme të shqiptarëve në Gjermani edhe pse sipas Lammers, të rinjve kosovarë u duhet edhe përgatitje profesionale.

Lammers tha se Gjermania ka nevojë për njerëz të zellshëm dhe punëtorë si kosovarët.