Departamenti Amerikan i Shtetit dënon ngjarjet në Mitrovicë

"Ne i ftojmë të gjitha palët që të shmangin eskalim të mëtutjeshëm të situatës dhe të veprojnë me qetësi e vendosmëri për të zgjidhur mosmarrëveshjet në mënyrë paqësore"

Keystone

Administrata e Presidentit Trump ka reaguar pas zhvillimeve në veri të Kosovës. Në një deklaratë së zëdhënëses së Departamentit Amerikan të Shtetit, Heather Nauert, dënohet tensionimi i situatës dhe bëhet thirrje për përmbajtje nga të dyja palët.

“SHBA-ja dënon fuqishëm ngjarjet në Mitrovicë, që në mënyrë të panevojshme ngrenë tensione dhe rrezikojnë stabilitetin rajonal. Ne i ftojmë të gjitha palët që të shmangin eskalim të mëtutjeshëm të situatës dhe të veprojnë me qetësi e vendosmëri për të zgjidhur mosmarrëveshjet në mënyrë paqësore. Për të krijuar paqe afatgjatë dhe stabilitet në Ballkan, të dyja, si Kosova, ashtu edhe Serbia, duhet të fokusohen në normalizimin e marrëdhënieve nëpërmjet dialogut të ndërmjetësuar nga BE-ja. SHBA-ja është e gatshme t’i mbështesë të gjitha palët në procesin e dialogut”, thuhet në deklaratën e zëdhënëses Nauert, përcjell albinfo.ch.