Fillon gjykimi i shqiptarit që vrau me grushte shtetasin e Sirisë

I pandehuri me pasaportë shqiptare, do të duhet të përgjigjet për veprën penale "vrasje"

Pas më shumë se gjysmë viti pas sulmit brutal të një shqiptari 22-vjeçar, në një diskotekë në Henstedt-Ulzburg të Schleswig-Holsteinit në Gjermani, në Kiel ka filluar procesi gjyqësor ndaj tij.

I pandehuri me pasaportë shqiptare, do të duhet të përgjigjet për veprën penale “vrasje”, shkruan “NDR”, përcjell Albinfo.ch.

Ai dyshohet se nga fillimi i muajit shtator të vitit të kaluar me dy grushte ka goditur në kokë një mysafir tjetër në diskotekë, duke i shkaktuar lëndime aq të rënda, sa që pak ditë më pas, viktima ka ndërruar jetë në spital.

Viktima 22-vjeçare nga Siria ka pësuar tronditje në tru, thuhet në aktakuzën e Prokurorisë, transmeton albinfo.ch.

Sulmuesi i dyshuar ishte arratisur nga vendngjarja. Policia gjermane kishte gjurmuar pas tij me foto nga kamerat vëzhguese. I pandehuri u arrestua në tetor të vitit të kaluar në vendkalimin kufitar me Zvicrën, në Konstanz dhe që atëherë është në paraburgim.

Vendimi pritet të sillet nga fillimi i muajit maj të këtij viti.