Banka e Diasporës ndikon në zhvillimin ekonomik të Kosovës

Ministri i Diasporës dhe Investimeve Strategjike, Dardan Gashi,  ka hapur në Gjermani takimin e parë të anëtarëve Premium të Unionit të Bizneseve Shqiptaro-Gjermane.

Në këtë takim kanë marrë pjesë rreth 60 biznese Premium, nga më shumë se 300 anëtarë që ka Unioni. Në njoftimin për media thuhet se  Gashi në fjalën hyrëse theksoi nevojën që afaristët dhe bizneset shqiptare në diasporë të avancojnë në fazë tjetër të bashkëpunimit me Kosovën, përcjell albinfo.ch.

Ai përmendi projektet kapitale siç është projekti i Bankës së Diasporës, projekte që ndikojnë në zhvillimin socio-ekonomik të Kosovës. “Puna që ka bërë Unioni që nga themelimi, ka rezultuar me atë që të keni mbi 300 anëtarë, mbi 60 nga ta anëtarë Premium. Kjo qasje profesionale e serioze ka bërë që Qeverinë e Republikës së Kosovës ta keni partner në rrugëtimin tuaj. Andaj, rekomandoj që kjo nismë e juaj të avancoj në fazë tjetër, atë të realizimit të projekteve kapitale të Unionit. Ideja juaj për Bankën e Diasporës, por edhe projekteve tjera, të fillojë së zbatuari”, citohet të ketë thënë ministri.

Në takim morën pjesë edhe zëvendëskryeministri, Fatmir Limaj, si dhe kryetari i Nderit të Rrjetit Global të Bizneseve Shqiptare në Diasporë, Lazim Destani.