Ministri i Punëve të Brendshme kërkon zero tolerancë ndaj shkelësve të rregullave në trafik

Pavarësisht se është krijuar një plan veprues dhe parandalues i aksidenteve në trafik, në raportin ditor të policisë nuk tregohen ulje të aksidenteve. Ministri i Punëve të Brendshme ka kërkuar që të mos ketë tolerancë ndaj shkelësve të rregullave të trafikut.

Ministri i  Punëve të Brendshme, Bejtush Gashi, ka diskutuar me Ushtruesin e Detyrës së Drejtorit të Përgjithshëm të Policisë së Kosovës,  Naim Rexha, për planin veprues dhe parandalues të “Task Forcës” e cila është formuar me qëllim zvogëlimin e aksidenteve në trafik.

Ministri Gashi në këtë takim ka thënë se Policia e Kosovës duhet të intensifikojë shqiptimin e gjobave kundrejt shkelësve të rregullave të trafikut deri në vetëdijesimin dhe ndërgjegjësimin e pjesëmarrësve në komunikacion.

“Ministria e Punëve të Brendshme në bashkëpunim me Policinë e Kosovës, do të jetë e pakompromis ndaj shkelësve në trafik dhe me qëllim të ngritjes së sigurisë në trafikun rrugor, do të ndërmarrin veprime policore shtesë, me qëllim të ngritjes së nivelit të sigurisë në trafik, dhe do të ketë zero tolerancë ndaj shkelësve të rregullave në trafik”, ka thënë ai.

Ndërsa, Naim Rexha ka theksuar se Policia e Kosovës do t’i zbatojë me rigorozitet masat që dalin nga Ligji i ri për Rregullat e Trafikut Rrugor që parasheh gjoba të ashpra.