Kosova falënderon Zvicrën për përkrahje

Ministri Hoxhaj dhe ambasadorja e Zvicrës në Kosovë, Krystina Marty Lang, janë dakorduar për fuqizimin e mëtutjeshëm të marrëdhënieve bilaterale

Ministri i Punëve të Jashtme i Republikës së Kosovës, Enver Hoxhaj ka falënderuar Qeverinë e Zvicrës dhe popullin zviceran për ndihmën e pa rezervë që ky shtet i kanë dhënë Kosovës dhe qytetarëve të saj gjatë dekadave të fundit.

Këtë deklaratë Hoxhaj e bërë gjatë një takimi që zhvilloi me ambasadoren e Zvicrës në Kosovë, Krystyna Marty Lang. Këtë të fundit Hoxhaj e informoi për progresin e vazhdueshëm në Republikën e Kosovës dhe hapat e fuqishëm në proceset integruese.

Ambasadorja e Zvicrës në Kosovë, Krystyna Marty Lang, vlerësoi lart progresin e arritur në Kosovë, duke shprehur përkrahjen e fuqishme të shtetit të saj për forcimin e subjektivitetit ndërkombëtar të Republikës së Kosovës dhe rrugën integruese në Bashkimin Evropian.

Sipas një kumtese lëshuar nga MPJ, shefi i diplomacisë kosovare dhe ambasadorja zvicerane kanë biseduar edhe për fuqizimin e mëtutjeshëm të marrëdhënieve bilaterale ndërmjet Zvicrës dhe Kosovës, si dhe avancimin e bashkëpunimit në shumë fusha konkrete ndërmjet dy shteteve.