Investimet e huaja në Ballkan: Shqipëria, e dyta

Foto Ilustrim

Shqipëria renditet në vendin e dytë në Ballkan, për nivelin prej 1.3 miliardë dollarë investime të huaja direkte që ka realizuar gjatë vitit 2018.

Raporti i publikuar së fundmi nga Organizata e Kombeve të Bashkuara (OKB) për investimet në botë, rendit në vendin e parë Serbinë me 4.1 miliardë dollarë, e ndjekur në vend të tretë nga Maqedonia e Veriut me 737 milionë dollarë, Mali i Zi dhe Bosnjë e Hercegovina.

Situata pozitive e nivelit të investimeve të huaja direkte lidhet kryesisht me dy projektet që po zhvillohen në Shqipëri, që janë gazsjellësi TAP dhe ndërtimi i hidrocentraleve mbi Devoll. Ndërsa investime të tjera po zgjerohen në sektorë të ndryshëm të ekonomisë nga sipërmarrës të huaj.

Edhe në muajt e parë të këtij viti institucionet zyrtarizuan ecurinë pozitive të trendit në rritje të investimeve të huaja, të cilat ndikuan në rritjen e këtij treguesi me 2%.

Banka e Shqipërisë, në raportin e publikuar pak kohë më parë, bëri të ditur se totali i investimeve të huaja kapi vlerën e 286 milionë euro për tremujorin e parë të 2019-ës.

Investimet në vend janë të përqendruara në energji dhe industrinë nxjerrëse dhe një pjesë tjetër në industrinë tekstile, në ndërtim, sistemin financiar etj., që ndikojnë në rritjen direkte të punësimit.

Ndërkohë që shifrat e fundit nga INSTAT tregojnë se Shqipëria kryeson me numrin më të madh të sipërmarrjeve të huaja nga vendet e Bashkimit Evropian, ku dominojnë ato italiane dhe greke. /ATSH/