Tiroli i Jugut dëshiron të bëhet Kanton i Zvicrës?

Kjo del nga paralajmërimi i një konference që do të mbahet në vjeshtë, e cila ka temën “Kantoni i Tirolit të Jugut – utopi apo model”

Pak kohë pasi që landi Baden Württemberg i Gjermanisë ka shprehur dëshirën për t`iu bashkuar Zvicrës (së pak sipas sondazheve të gazetave të atjeshme) tash edhe krahina autonome e Tirolit Jugor, në Itali, ka shprehur po këtë dëshirë. Kjo nxirret si përfundim nga paralajmërimi i një konference që do të mbahet në vjeshtë të këtij viti, e cila ka temën  “Kantoni i Tirolit të Jugut – utopi apo model”. Konferenca ose “6 Global Form Südtirol” (GFS) mbahet në kryeqendrën e kësaj krahine me status special, në Bozen (Bolzano).

Për të ligjëruar në këtë forum janë ftuar politikanë zviceranë, të cilët pritet t`ua shpjegojnë tirolasve funksionimin e sistemit të Zvicrës.
Themeluesi i GFS, Christian Girardi, i cili jeton në Zvicër prej gjashtë vitesh, thotë se “ne në Tirolin Jugor jemi shumë të afërt me zviceranët për nga kultura. Edhe ne identifikohemi  fuqishëm me malet dhe flasim tri gjuhë të ndryshme.”

Tiroli Jugor, i banuar nga gjermanofonë, gëzon statusin special autonomie që nga viti 1972.
Girardi, përparësinë më të madhe te Zvicra e sheh në demokracinë  direkte të saj. I pyetur nëse Tiroli Jugor me të vërtetë dëshiron t`i bashkohet Zvicrës, ai ka thënë se ai nuk mund të flasë në emrin e banorëve të Tirolit prandaj nuk dëshiron të thotë diçka të gabuar. Por, në vazhdim Giradi megjithatë pohon: “Në të vërtetë po, Disa tirolas të jugut me siguri do të ishin në favor që të bëhemi një kanton i Zvicrës”.