Prince Harry u rikthye në Britani të Madhe

Anëtari i famshëm dhe shumë i pëlqyer i familjes mbretërore është rikthyer në vendlindje për një angazhim të fundit, përpara se të largohet nga Monarkia.

Princi 35-vjeçar, nga 20 janari ka qëndruar në Kanada bashkë me gruan, Dukeshën Meghan Markle dhe djalin e tyre Archie, kjo pasi e bënë publik lajmin se kanë vendosur të largohen nga obligimet si anëtarë aktivë të familjes mbretërore angleze. Tashti ai ka udhëtuar drejt Britanisë së Madhe për t’i përmbushur detyrat e tij zyrtare, shkruan Koha.net.

Në mëngjesin e sotëm Harry e ndoqi një konferencë ndërkombëtare në Edinburgh, ngjarje kjo që është pjesë e iniciativës eko-turistike “Travalyst”, të cilën ai e lansoi verën e kaluar në përpjekje për t’i bërë udhëtimet dhe turizmin sa më të përshtatshme për ambientin.

Më 5 mars, Harryt do t’i bashkohet edhe Meghani për ta ndjekur ngjarjen “Endeavour Fund Awards” në Londër, dhe dy ditë më vonë, çifti do të jetë i pranishëm në festivalin “Mountbatten Music Festival” që mbahet në sallën e famshme “Royal Albert Hall”.

Nuk është e qartë nëse Meghan dhe Archie aktualisht gjenden në Britani të Madhe apo në Kanada.

Çifti më i ndjekur nga mediat botërore zyrtarisht do të lirohen nga angazhimet e familjes mbretërore më 31 mars të këtij viti, përcjell Albinfo.ch.